August 27, 2024, (Cebu City) Duha ka mga award ug premyo ang nadawat sa kagamhanan sa Lungsod sa Bantayan pinaagi sa Palawod Festival atol sa gihimong Pasigarbo sa Sugbo 2024 didto sa Cebu City Sports Center.
Wa man maapil ang Palawod Team sa top ten sa ritual showdown ug street dancing pero nakuha niini ang 1st place sa carroza design ug 4th place sa best in decorated floats o audio van atol sa parada niadtong August 25, 2024, Sunday.
Kini ang unang higayon nga miapil ang Lungsod sa Bantayan sa carroza design apan nakahatag kinig dakog atenyon sa mga hurado tungod sa kaanindot sa atong carroza diin makita ang imahen sa atong patron nga si San Pedro Apostol.
Gipasalamatan ni Mayor Despi ang tanan nga mga naapil sa paningkamot ug sakripisyo aron maporma ang atong carroza ug float/audio van labi na sa grupo ni Juliemar Alolor ug sa engineering office pinangulohan ni Architect Jerome Pacina.
Mas gisaludohan sa mayor ang mga dancers, propsmen, choreographers, directors ug uban pang apil sa palawod team tungod kay gibuhat gyud niini ang tanan aron lang ipasundayag atubangan sa gatosan ka mga tawo atol sa grand ritual showdown ug sa minilyon nga mitan-aw sa facebook live ang maayong performance sa bag-ong palawod. / Jun Veliganio
